Ezani zhurmen e shendron ne qetesi shpirterore

EZANI ZHURMËN E SHNDËRRON NË QETËSI SHPIRTËRORE

Organi kryesor i shqisës së të dëgjuarit është veshi. Funksioni i tij është mbledhja, përcjellja dhe përpunimi i sinjaleve akustike, tingujve, zërave, zhurmave drejt organeve të tjera të aparatit dëgjimor.

Pjesët e veshit janë: pjesa e veshit të jashtëm, të mesëm e të brendshëm.

Pjesa e jashtme e cila përbëhet nga llapa e veshit, kanali i dëgjimit dhe daullja e veshit.

Pjesa e mesme e cila përbëhet nga tre kockëzat e veshit, çekiçi, yzengjia, kudhra (stapes, incus dhe malleus).

Pjesa e brendshme e cila përbëhet nga Kërmilli (Cochlea), që shërben për transformimin e lëkundjeve mekanike në impulse nervore, dhe labirinti, ose i quajtur organi vestibular, që nuk i shërben dëgjimit por ndjenjës së ekuilibrit.

Duhet ditur se dëgjimi është një proces ndijorë rezultat i një aktiviteti të sinkronizuar të një sërë organesh dhe qelizash.

Njeriu është në gjendje  të shquajë një repertor të gjerë tingujsh dhe të prodhojë imazhe sonore, kjo realizohet në sajë të pranisë së një kategorie qelizash të specializuara të pozicionuara në zonën e veshit të brendshëm.

Gjatë procesit të dëgjimit valët e zërit kapen së pari nga llapa e veshit të jashtëm i cili i "mbledh" ato dhe i drejton për në kanalin dëgjimor. Pastaj valët godasin daullen e veshit ose membranën timpanike që shtrihet gjatë fundit të brendshëm të kanalit dëgjimor dhe e bëjnë atë të dridhet. Tre kockat e veshit të brendshëm (të quajtur çekiçi, kudhra dhe yzengjia) i dërgojnë këto dridhje te kërmilli i veshit, një organ në formë spiraleje në veshin e brendshëm. Dridhjet e zërit që futen në kërmillin e veshit krijojnë valë në lëngun që ai përmban. Këto valë bëjnë që një ndarje delikate, membrana bazilare të ndryshojë formën e saj.

Çka thotë Kur’ani për dëgjimin?.

Dëgjimi është i përmendur në Kur’an, Zoti i Lartëmadhëruar tregon për dëgjimin, shikimet, që nga embrioni ku thotë:

“Allahu ju nxorri nga barqet e nënave tuaja kur nuk dinit asgjë. dhe ju bëri me shqisa të të dëgjuarit, të parit dhe me zemër e mendje...”(15 :78).

Shihet se sipas Kur’anit renditja fillon me dëgjimin e pastaj shikimet. Kur’ani dëgjimin e ka përmend në njëjës ndërsa shikimin në shumës. Renditjen e këtyre shqisave  e vërteton edhe embriologjia. Të shikojmë si e shpjegon embriologjia krijimin e fetusit dhe organet dëgjimore dhe shikimet:

Sipas embriologjisë ndjenja e dëgjimit formohet para funksioneve tjera vitale.

Që nga java e 8 e shtatzënisë fillon të zhvillohet Shqisa e dëgjimit .

Prej javës së 18 deri në javën 22 të shtatzënisë  formohet  veshi i brendshëm dhe nervat e trurit janë të zhvilluara mjaftueshëm  ashtu që foshnja dëgjon të rrahurat e zemrës së nënës.

Rreth javës së 25 të shtatzënisë foshnja dëgjon edhe zërat e jashtëm, ndërsa gjer në javën e 27 fillon njohjen e zërave.

Për dallim nga shqisa e të të dëgjuarit, shqisa  e të parit  zhvillohet tek në javën e 26 të shtatzënisë, pas kësaj periudhe embrioni fillon t’i hapë dhe ti mbyllë sytë.

Duhet pasur parasysh që fëmijët në rend të parë duhet aktivizuar në dëgjim e pastaj në shikimin e lojërave, pra në argëtimin e tyre në lojëra kompjuterike, pra në rend të parë duhet ta aftësojnë shqisën e të dëgjuarit e pastaj shqisën e të parit, e jo siç po ndodhë në shekullin  njëzetë e një ku po zhvillohet gjenerata e të parit në rend të parë e pastaj të zhvilluarit e dëgjimit, gjë që do të  ndikojë që njeriu të jetojë më i izoluar dhe më i mbyllur në vetvete. Shkaktar i kësaj është zhvillimi i i teknologjisë informatike kompjuterike.

  

Dëgjimi dhe dëmtimi i dëgjimit

Dëgjimi është dhunti e Zotit, dhe këtë dhunti duhet shfrytëzuar për atë për çka e ka krijuar Zoti i Lartëmadhëruar, dëgjimi është mjeti i pranimit të shpalljes, pa të dëgjuar nuk do të kishte qenë e mundur të pranohej shpallja prej pejgamberëve, mirëpo sikurse edhe pjesët e tjera të trupit dëmtohen ashtu edhe dëgjimi dëmtohet. Zoti i Lartëmadhëruar thotë: “Thuaj: Nëse Allahu ua merr të dëgjuarit, të parit dhe ua mbyll zemrat dhe mendjet, cili zot tjetër pos Allahut do të ju sjell  ato”.

Si dëmtohet shqisa e dëgjimit

Dëgjimi dëmtohet kur membrana bazilare deformohet nga një valë zëri që vjen në të, organi i Kortit gjithashtu zhvendoset. Ky organ përmban receptorët dëgjues, një koleksion qelizash me zgjatime në formë qimesh. Sipër tij është membrana tektoriale. Lëngu tek kërmilli i veshit e shtyn lart membranën bazilare kështu që qelizat me zgjatime në formë qimesh fërkohen me membranën tektoriale. Ky veprim shkakton menjëherë impulse nervore në nervin dëgjimor, i cili i përcjell mesazhet deri në lobet temporale të trurit.

Dëmtimi i dëgjimit bëhet nga:

1. Ndotja akustike.

2. Përdorimi i barnave (ilaçeve) dhe

3. Emocionet dhe ndjenjat negative.

         1. Nivelet e dëgjimit dhe ndotja akustike.

Si  aparat i dëgjimit  veshi nuk mund të dëgjoj zërin prej 0-10 dB ,  këtë ultësi të zërit e ka buburreci.

Njeriu nuk mund ta dëgjoj zërin e buburrecit sepse ai ka ultësinë prej 0-10 dB, dhe Zoti i Lartëmadhëruar këtë e ka treguar para 14 shekujve kur ka thëne: “Dhe atëherë kur arritën në luginën e buburrecave, një buburrec tha: “O ju buburreca  hyni në vendet  tuaja që të mos u copëtojë Sulejmani dhe ushtria e tij duke mos ju vërejtur” (en-Neml;18).

Fazën e parë të dëgjimit ku veshi  mund ta dëgjojë zërin është prej 10-20dB.  Ky është zëri më i ulët që Kur’ani  e ka quajtur “Rikza”, me fjalë  tjera  fillimi i dëgjimit fillon nga kjo masë e zërit. Thotë Zoti i Lartëmadhëruar : “...ose a po e dëgjon zërin tepër të ulët të tyre (Rikza).” (Merjem;98).

Faza e dytë e dëgjimit të veshit është prej 20-40dB. Ky është zëri i ulët që Kur’ani e quan “hemsa”. Thotë Zoti i Lartëmadhëruar: “E para të Gjithmëshirëshmit ulen zërat e nuk dëgjohet tjetër pos një zë i ulët (hemsa).” (TaHa;108).

Niveli kur fillon të çrregullohet gjumi është 42-45 dB.

Dëmtimi i  mundshëm i  të  dëgjuarit  bëhet  prej 120-140 dB.

Kur’ani ka përmend se një dënim prej dënimeve para ditës së Kijametit është “ushtima” (Sajha) e cila do të jetë  prej 160 deri në 200 dB.

Niveli më i larti i ushtimës është në ditën e Kijametit të cilën Zoti i Lartëmadhëruar e ka cilësuar është “Saaaahatun”  e cila do të jetë prej 200 deri në 240 dB.

Shurdhimin e nervit  të veshit e shkakton ndotja akustike ndërsa ndotjen akustike  e shkaktojnë:  zhurmat e prodhimit në industrinë tekstile, në prodhimin e mineraleve, po ashtu  ndotjen akustike e shkaktojnë burimet e  ndryshme të veprimtarive  njerëzore siç janë mjetet e transportit, pra që nga mjetet motorike automobilistike, hekurudhore (trenat) dhe ajrore (aeroplanët), etj.

Makina në ecje (50 km/orë) shkakton akustikën në 60-80 dB;  Trenat e shpejtë, me shpejtësi maksimale (300 km/orë) shkaktojnë zhurmën në  110 dB;  Kamioni në ecje (50 km/orë) shkakton zhurmën në 78-92 dB;  Aeroplani në ngritje  shkaton zhurmën  në 110 dB;

Përpos  industrisë dhe mjeteve motorike  dhe automobilistike ndotja akustike shkaktoht edhe nga aktivitetet private, qofshin nga lokalet natës muzika rok e lartë, apo sallonet e bastoreve.

 Dihet se në Evropë rreth 65% e popullsisë janë të ekspozuar niveleve të larta  të zhurmës (për 24 orë në 55 dB) e cila shkakton acarime dhe shqetësime të ndryshme.

 Rreth 113 milionë njerëz (17%) janë të ekspozuar ndaj niveleve të zhurmës në mjedise më të mëdha në 65 dB. Rreth 10 milionë njerëz janë të ekspozuar ndaj niveleve të papranueshme të zhurmës (për 24 orë në 75 dB).

Ka një konsensus se niveli i zhurmës në mjediset e hapura nuk duhet të kalojë 65 dB gjatë ditës, ndërsa në vendbanimet e reja ai nuk duhet të jetë më shumë se 55 dB.

 Përpos zhurmave të jashtme janë dhe zhurmat e brendshme të veshit të cilat  vijnë nga dëmtimi mikroskopik në mbaresën e nervit të dëgjimit në veshin e brendshëm. Lëndimet në këto mbaresa shkaktojnë edhe humbjen e dëgjimit.

2. Përdorimi i barnave (ilaçeve)

Dëmtimi i dëgjimit  nuk bëhet vetëm prej ndotjes akustike, por  edhe prej faktorëve tjerë siç janë: marrja e tepërt e ilaçeve (barnat anti-inflamatore, antibiotike, sedativët, barnat kundër depresionit si dhe aspirina). Po ashtu nga procesi i plakjes. Pastaj ndikon faktori social-psikologjik dhe ekonomik, demografik si dhe statusi social.

3. Emocionet dhe ndjenjat negative.

Faktorë tjerë të dëmtimit të dëgjimit janë edhe varietet emocionale negative, sikurse zemërimi,  depresioni, ankthi, shqetësimet e ndryshme, lodhja si dhe dëshpërimi.

Ezani dhe dëgjimi

         Ezan (ar: Edhan) është folje  nga emri “udhun” që do te thotë vesh. Edhe pse në gjuhën shqipe quhet ezan, duhet të quhet edhan. Veshi është mjeti i pranimit të shpalljes nga Zoti i Lartëmadhëruar. Kur është dhënë propozimi që thirrja për namaz të bëhet nëpërmjet kambanave ose borisë nuk ka kalua ai propozim  por iu është dhënë përparësi propozimit të zërit të njeriut dhe është caktua sehabiu Bilalli r.a. i cili ka pasur zërin e bukur.

Ezani është sunet i fortë  dhe po ashtu sunet kifaje, që do të thotë se nëse në një lagje thërritet ezani në shtëpi ai cili falet nuk e thërret ezanin, kjo nënkupton se  mjafton ezani i njërit për të tjerët, por nëse në një lagje nuk ka ezan atëherë ai i cili falet në shtëpi e thërret ezanin aq sa e dëgjojnë veshët e tij sepse ezan do të thotë dëgjim. Pra, do të thotë thirrje publike e cila duhet të arrijë deri te veshi i njeriut e jo që i tejkalon normat e veshit sepse ezan do të thotë aq sa arrin te veshi e jo çka e dëmton veshin. Zoti i Lartëmadhëruar ka thënë: “Dhe ku ka fjalë më të bukur se sa fjala e ati j i cili thërret për Allah dhe vepron punë të mira dhe thotë: Me të vërtetë unë jam prej muslimanëve” (Fusilet;33). Komentatorët mendojnë se këtu është fjala për atë i cili e thërret ezanin.

Ezani thirret në një gjuhë të përbashkët: gjuhën Arabe. Në Ezan përmendet emri i Allahut, i të dërguarit të tij, bëhet thirrja për lutje dhe për shpëtim. Siç e  përmendëm më lartë se dëmtimi i dëgjimit shkaktohet prej tre faktorëve  e ato janë: ndotja akustike, përdorimi i barnave dhe emocionet negative. Duke patur parasysh se 70% e trupit të njeriut  përbëhet nga uji përderisa profesori japonez  Emoto (ka punuar me mikroskop mbi kristalet e ujit për 12 vite me radhë) ka konstatuar se kristalet e ujit reagojnë ndaj faktorëve të jashtëm, si: fjala dhe muzika. Ai ka konstatuar se kur njeriu dëgjon fjalë të bukura ose kur i thuhen lutje, pastërtia dhe përbërja gjashtëkëndëshe e kristaleve të ujit shfaqet më dukshëm, përderisa  kur artikulohet fjala “djall” pranë ujit, kristalet hyjnë në forma kaotike, deformohen. Po ashtu kur pranë ujit lëshohet muzikë Heavy-metal, kristalet e ujit shpërbëhen, përpos kësaj kur pranë ujit përdoren fjalë fyese, banale kristalet e tij deformohen.

Ai  ka konstatuar se kristalet e ujit reagojnë edhe  kur mendohen gjëra negative, kur  njeriu është  i shqetësuar, kristalet e ujit deformohen. Uji reagon edhe sipas gradëve të ndryshme të vetëdijes, sikur i di të gjitha dhe merr formë sipas përbërjes së tyre.
Në një rast kur është pyetur prof. Emoto:  “Si reagojnë kristalet e ujit kur u jepet të dëgjohet Kur’an? Apo ndaj 99 emrave të Allahut?.

Përgjigja e tij ka qenë: “Kristalet shfaqeshin në një mënyrë aq të bukur, saqë fillova të mendoja nëse unë kam gjë lidhje me Islamin?” 

A nuk ka thënë Zoti i Lartëmadhëruar: “Pra me të përmendurit e Allahut qetësohen zemrat” (Err-Rrad;28). Thirrja e ezanit 5 herë në ditë, në ezan bëhet përmendja e Allahut  dhe  kur ushqim ditor përpos ushqimit janë edhe barnat, dhe ndotja akustike shkaktohet  nga fabrikat automjetet dhe nga faktorët e ndryshëm dhe krijohen  zhurma të ndryshme të cilat shkaktojnë shqetësime,  ezani shqetësimin e shndërron në qetësim të zemrës dhe në qetësi shpirtërore. Gjithsesi kjo do të mbetet temë diskutimi në të ardhmen sepse njeriu ka nevojë të qetësohet e qetësimi i i zemrës së njeriut bëhet duke e përkujtuar Zotin sepse Zoti i Lartëmadhëruar ka thënë: “Ata të cilët besojnë dhe i qetësojnë zemrat e tyre duke e përkujtuar Allahun, pra duke e përkujtuar Allahun qetësohen zemrat dhe shpirtrat”.

(err-Rra`d;28).

Dr. Musli Vërbani